કવિતા નામે સંજીવની (ઈ-બુક)

મિત્રો,

કવિતા નામે સંજીવની - સંજુ વાળા - પ્રકાશક : ગુજરાત સાહિત્ય અકાદમી - ગાંધીનગર

હવે ઈ-બુક સ્વરૂપે....

કોઈને  સુખ   કોઈને  ન્યોછાવરી  જીવાડશે

અમને  કવિતા નામની  સંજીવની  જીવાડશે

- સંજુ વાળા...

કવિતા નામે સંજીવની સંપૂર્ણ ડાઉનલોડ કરવા અહી ક્લિક કરો....

ખણખણે છે ખંજરી..

જેવું   છે   એવું   જ   અવતરશે   અને  મરશે  ફરી 

યુગ-યુગાન્તરથી  અહર્નિશ  ખણખણે  છે  ખંજરી..

છાતી    કૂટી,  ચીસ    પાડી ‘ને    પુરાવી   હાજરી 

 તે  છતાં  અસ્તિત્વની   સ્થાપી  શક્યા  ક્યાં  ખાતરી

ટેલિફોનિક   ટોક   જેવા   દૂરના   સમ્બન્ધ   આ –  

ક્યાં   વળાંકે   થાશે   કટ્ટ..?  અધવચાળે   આતરી !

સિદ્ધિ  કે  સગવડ ભર્યું  હોવાનું  ક્ષુલ્લક  બ્હાનું  લઈ  

ભેંસ   થોડી   મારીએ  ?  એક   પામવાને    વાધરી

તર્કના   રંગીન   ફુગ્ગાથી   મઢ્યું  છે   તારું   વિશ્વ  

મારા   આકાશે ય   નમણી    કલ્પનાઓ    વિસ્તરી

પાંચ  ડગલાં  પાછાં  ફરતાં  અપશુકન થઈ જાય છૂ..  

શું  કરો જ્યાં  ઊંબરા  પર  આડી  આફત   ઊતરી ?

મૃત્યુ   તો   છે   વન્યપ્રાણી    હોય    સર્કસનું   ભલે   

એ   ગમે   ત્યારે    પ્રગટશે   પૂર્ણ    હીંસકતા   ધરી

ફરી ફરી

સરવૈયાં    લેણ-દેણનાં    માંડ્યાં    ફરી  ફરી

તો  કૈં  જ  હાથ  ના  ચડ્યું  સિવાય  વૈખરી

દર્શનનો  લ્હાવ એથી  વધારે ના  લઈ શક્યા

અનિમેષ  બસ નીરખ્યાં  કરી પીળી  પાંભરી

ખૂટી  ગયાં  હો ભોજ  નિજી  ભૂમિ-ભાવનાં

ઉઘરાવ    શબ્દકોષના     પાનેથી     ગોચરી

કવિઓ   ગઝલમાં   કોઈ   કબૂતર   ઉડાડશે

તો   એના   દ્રારે    માથું   પટકશે    કબૂતરી

આવે   છે   છાનાંછપનાં   પગેરું   દબાવતા

મિત્રો  એ  જાણવાં શું  લખાવે  છે  જળપરી

એવું ય   આજકાલ    ઘણું    સંભવી    શકે

પોતાના  પગની  સાવ  જુદું  ઝણકે  ઝાંઝરી

છેવટ  ઢળી પડ્યું  ક્ષિતિજે  લોહીઝાણ નભ 

ઓઢીને   કાળું    કપડું   ફરે   છે  વિભાવરી