સાધુ છે સાહેબ..

તમસ ‘ને  તેજ  તો  સિક્કાની  બેઉં  બાજુ  છે  સાહેબ,

સમજ હો એવી એ જન આશિખાનખ સાધુ છે સાહેબ.

ખરેખર  વ્યક્ત  થાવું  એજ  તો  અજવાળું  છે  સાહેબ

મઝા  પડવી  ના  પડવી  તો  રૂપાળા  જાદુ  છે  સાહેબ

દિશાઓ ચારે ખુલ્લી  હો અને નભ  કોરુંકટ્ટ  તો પણ –

હ્રદયરસના   છલકવાની  ઋતુ :  ચોમાસું   છે   સાહેબ

જુદા  સંજોગવશ ના  આપણે   આવી  શક્યા  નજદીક

વસો  છો આપ  જ્યાં એ મારું પણ  ઠેકાણું  છે સાહેબ

સવા  ગજ  ઊંચું  ચાલે  છે તો  એમાં  શું  અચંબો  છે ?

કવિના    શબ્દનાં   પરમાણવાળું    ગાડું   છે   સાહેબ.