સઘળું બાજુ પર મૂકીને !

પાછોતર  એક  પળમાં  પેઠા  સઘળું  બાજુ પર મૂકીને !

કરવાને   કાંઈ   જોખા-લેખા   સઘળું  બાજુ પર મૂકીને !

ઘર – ખેતર   ફૂંકીને   બેઠા    સઘળું  બાજુ પર મૂકીને !

જાણે  બીજાં  નરસી  મે’તા     સઘળું  બાજુ પર મૂકીને !

અંદરથી  જે  ઊગે  એની આંગળીએ આગળ  નીકળશું

સ્વયમ્ ગુરુ ‘ને સવ્યમ્ ચેલા સઘળું બાજુ પર મૂકીને !

ક્યાં થાશે વિસ્ફોટ, તૂટશે કોની પાંખો? એ અચરજ લઈ

કતારબંધ   બેઠાં   પારેવાં     સઘળું  બાજુ પર મૂકીને !

રહ્યું  ના  એકે  વ્રુક્ષ  તો   લ્યો  હું મારી બન્ને બાંહ પસારું

પંખી !   બાંધો    રેનબસેરા   સઘળું  બાજુ પર મૂકીને !

પથ્થર તળમાં પાણી રમતાં, પાણીમાં પથ્થર તગતગતા

કૌન રમત ? એ કૈસા ખેલા ? સઘળું  બાજુ પર મૂકીને !