વિશેષણ આપજે

છુટ્ટું  મૂકીને  મન  સકારણ  આપજે

ઓછા   અધૂરામાં  ઉમેરણ  આપજે

ભાષા  સરળ  ભાવે વિલક્ષણ આપજે

ગુર્જર-ગઝલ રચવા રસાયણ આપજે

તું આપવા ધારે તો ક્યાં કોઈ ખોટ છે ?

આદિમ  અનર્થોનું  નિવારણ  આપજે

તેં નામ  આપ્યું તો હવે આગળ ઉપર

એ  નામથી  નમણું  વિશેષણ આપજે

સોહામણું  હો  સ્વપ્ન, લાંબી  રાત હો

એવા   પ્રસંગોપાત   લેખણ  આપજે

કાફી-ના  લયમાં  ઓગળી  હો ઠૂમરી

એવી  સુરીલી  સાંજની  ક્ષણ  આપજે

છે  કાન    બત્રીસલક્ષણા  કાપાલિકો !

હે સાંઈ !  સમજીને  શિખામણ આપજે