હક કરી કરીને

રમણીય સ્વરની સાથે ટક ટક કરી  કરીને
તું જાગતા જ રાખે   રકઝક   કરી  કરીને 

હમણાં સમાપ્ત થાશે  સત્ર ક્રાઉ ક્રાઉનું પણ

આ ચકલીઓ પજવશે ચક ચક કરી કરીને 

શું અન્ય  કોઈ  રીતે  એ સંભવી  શકે  ના ?

સાબિત થવાનું જીવિત ધક ધક કરી કરીને ?

ફાટેલ  આ  મિજાજી  કંઈપણ નહીં સ્વીકારે

વીણી વીણીને   લેશે  એ  હક  કરી  કરીને 

હું બૂમ  પાડી ઊઠું  એ પહેલાં પ્લીઝ, સાંભળ

થાક્યો છું ‘નામ-સમરણ’ અણથક કરી કરીને 

સમૃધ્ધ  સૌ   ઠઠારા   તારા  તને  મુબારક !

ભીતર  અમે ય  રાખ્યાં ભરચક  કરી કરીને 

મારી  પ્રતીતિઓનાં  સઘળાં  પ્રમાણ  કવિતા

અન્યત્ર  ક્યાં તું  શોધે  છે  શક કરી  કરીને ?

ક્યાં  જ્ઞાનગોષ્ઠિ વચ્ચે  આવી ચડ્યા હે સંજુ !

ગઝલો ય કહેવી  પડશે  મુકતક કરી કરીને