તું નહીં તો શું ?
એવા સવાલ સાંજ પડતા સુધીમાં તો થઈ જાતા વૈશાખી લૂ.
માથા પર સણસણતા તોર ભર્યા રઘવાટે
નીકળું હું છાંયડાની શોધમાં;
પાનીમાં ખૂપેલી રસ્તાની કાંકરીઓ કહેતી
કે જીવતર અવરોધમાં.
સુકું કોઈ ઝાડ ખર્યા પાંદડામાં ખખડીને
પાછા વળવાનું મને કહેતું,
તું નહીં તો શું ?
છાતી તો ઠીક છેક જીવ સુધી પહોંચીને
ભીંસે આ પહાડોનો ડૂમો;
સાંભળશે કોણ મારા કંઠમાં ને કંઠમાંજ
સામટી સુકાઈ જતી બૂમો.
આંગળી વઢાય એને ભૂલી શકાય પણ
ભૂલ્યો ભુલાય નહી તું..
તું નહીં તો શું. ?
No comments:
Post a Comment