જળઘાત

પાણીને પરસેવો અથવા જળને આવ્યાં
          ઝળઝળિયાંની ખબર પડે શી રીતે ?
તાણ ઘૂમરી તરફડિયાં તલસાટ તૂટામણ
          ચગડોળાતું શું શું એના ચિત્તે ?
         
પડે કાંકરી ધ્રુસાંગ, પડઘે ગિરિ કંદરા ગાજે
          લયવલયમાં જળઝાંઝરિયાં ઝીણું ઝીણું લાજે
સમથળ માથાબૂડ ભર્યા બરપૂર ઓરડે
          જળ રઘવાયું પટકે શિર પછીતે
તાણ ઘૂમરી તરફડિયાં તલસાટ તૂટામણ
          ચગડોળાતું શું શું એના ચિત્તે ?

          જળમાથે ઝૂકેલી ડાળી લળે; જળ છળે, ફરી…
          એક થવાને ઝૂઝે શાપિત યક્ષ અને જળપરી
જળઘાત લઇ જન્મેલું જળ, પળી પાવળે
          વહેંચાઇ વેચાય નજીવાં વિત્તે
તાણ ઘૂમરી તરફડિયાં તલસાટ તૂટામણ
          ચગડોળાતું શું શું એના ચિત્તે ?