ભવ્ય ગઝલ ગુજરાતી

રૂપ-અરૂપા   હે   શતરૂપા !  ભવ્ય ગઝલ ગુજરાતી

તું જ છલકતા અમિયલ કૂપા ભવ્ય ગઝલ ગુજરાતી

તુ  કેદારો,   તું  મંજીરા ,  તું  જ  ચદરિયા  જીની

રે ભજનોની નિત્ય અનૂપા ! ભવ્ય ગઝલ ગુજરાતી

બાલાશંકર, સાગર, શયદા, મરીઝ, ઘાયલ, આદીલ

મનોજ, મોદી, શ્યામ, સરૂપા  ભવ્ય ગઝલ ગુજરાતી

તું ચંદા, તું  સનમ,  છાન્દસી,  તું   ગિરનારી  ગૂહા  

સૂફીઓમાં તું  સ્પંદન  છૂપા  ભવ્ય ગઝલ ગુજરાતી

અર્થા, વ્યર્થા,   સદ્ય સમર્થા,  તું  રમ્યા , તું  રંભા –

તું મારી  ભાષામાં  ભૂપા !  ભવ્ય ગઝલ ગુજરાતી