રંગીન માછલી છે

ઝાંખા  ઉજાસ વચ્ચે  તેં  જે  કથા કહી છે ,

સાંભળજે કાન દઈને એની જ આ કડી છે

પંખીયુગલને  વડલાની  ડાળ સાંપડી  છે

ને ક્રોંચવધની ઘટના જીવમાં ઝમી રહી છે

પળને બનાવે પથ્થર,  પથ્થરને પારદર્શક

તાકી રહી છે કોને ? આ કોની આંગળી છે ?

નખ  હોય તો કપાવું, દખ હોય તો નિવારું

ભીંતરને  ભેદતી આ  મારી જ પાંસળી છે 

કાજળ બની ને આવો કે જળ બની પધારો ,
પાંપણથી નમણી બીજી ક્યાં કોઈ પાલખી છે ?

ઇચ્છાના  કાચઘરમાં  એ  કેદ  થાય  અંતે,
માણસનું  નામ  બીજું  રંગીન  માછલી  છે