એમાં શું કરવી ચત–બઠ
તું પણ શઠ ‘ને હું પણ શઠ
ગાંઠ વળી ગઈ છે નિંગઠ
થાય નહિ પાંચમની છઠ
છૂટક – છૂટક કે લાગઠ
ફેરા ફરવાના અડસઠ
ફતવા, ડંકા, તાબોટા
સૌને સૌના નિજી મઠ
તારા સિંહાસન સામે
અમે ય લે ઢાળ્યો બાજઠ
તારે શું તડકો ? શું ટાઢ ?
ઓ..રે ! પૂતળી સુક્કીભઠ
અહીંથી હવે ઉડો ગઝલ !
બહુ જામી છે હકડેઠઠ
અક્ષરને ય ભાગ્યા,તોડ્યા
બાળક જેવી લઈને હઠ
અવળે હાથે પીધો અર્ઘ્ય
અકોણાઈ ઊગી લાગઠ
‘અહાલેક’-ની સામે બીજો
નાદ કોઈ માંડે ના બઠ
તારે કારણ હે નરસિંહ !
વૈષ્ણવજન આખું સોરઠ .
No comments:
Post a Comment