શું કરું ?

પ્રપંચનો  પહાડ  પાર  થાય  તો  પ્રગટ  કરું

ઝીણું અમસ્તું રેતકણ હું કોની સામે વટ કરું ?

ન રાખું કૈં જ  ગુપ્ત, ન કશી ય  ચોખવટ કરું

રહસ્ય એ જ ઘેન હો  તો  ઘૂંટી ઘૂંટી ઘટ  કરું

બહુ જ ગોળ ગોળ લાંબુલચ ક્થ્યા કરે છે  તું 

કરું હું સાવ અરધી વાત, કિન્તુ ચોખ્ખીચટ કરું

લે, ચાલ  સાથે ચાલીએ  મુકામ શોધીએ નવા

નિભાવ  સાથ  તું, તો તારા સાથનું  શકટ કરું

અમે ય થોડા ભીતરે અજંપ  ધરબી રાખ્યા છે-

ચડ્યો  છે કાટ કેવો જોઉં, કે ઉલટપુલટ કરું ?

હું એ જ કારણે રહું  સ્મરણની  હદથી દૂર..દૂર..

છે ઠંડી ઠંડી  આગ એ,  વધારે શું નિકટ  કરું ?

છે ભાવમય,  તું શબ્દની  સપાટીએ  ના સાંપડે

હો પથ્થરોનું શિલ્પ તો હું શું કરું ? કપટ કરું ?