કવિતા:સંજીવની

ગઝલ -  તું સ્વપ્નથી સહી કરે

આ રાતની ત્વચા ઉપર તું સ્વપ્નથી સહી કરે ,
સુમસામ પાંપણો તળે એ દૃશ્ય જો હરે-ફરે

મારી દરેક રાત સળગે સોડીયમ પ્રકાશથી
ને ભગ્ન જાળિયામાં એક દીવો બળે સમાંતરે

હું મોરપિંચ્છનું કરું કેવી રીતે પૃથક્કરણ ?
પ્રત્યેક રંગ આંખથી ટહુકા બનીને નીતરે !

ચર્ચાને તીક્ષ્ણ ન્હોર હોવા જોઈએ નહી તો આ,
પડતર બનાવનું અહી ઊંડાણ કોણ ખોતરે ?

દિવસોથી એક દૂરતા આવી વસી છે ઉંબરે
એવું બને કે , એ હવે આકંઠ આવી ઉછરે