સખીરી ગીત

આપું ઋત, દિશા ને નક્ષત્રોનાં નામ ,
સખીરી, તમે અમારા કલમજાયા શબ્દઅડોઅડ પથરાયેલું ધામ .

મેં કહ્યું તું આરસ અથવા
ઝીણી જળવત ઘટનાઓની છબી,
તેં પવનમાં આળેખીને
ચીંધી પળવત ઘટનાઓની છબી,
સખીરી, ભૂરા, તૂરા, આછેરા ઝબકારા વચ્ચે અનુભવેલું ગામ
સખીરી, તમે અમારા કલમજાયા શબ્દઅડોઅડ પથરાયેલું ધામ .

ચાર પ્રહરનું જળ ડહોળીને
નીલમણિ શી આંખ બની ગઈ કોડી
અલ્લપ-જલ્લપ અણસારાવત
તેજ- લકીરે અધમણ મૂર્છા તોડી
સખીરી, ચેતનવંતી તમે પંક્તિ અમે કોંસમાં આવી ઊભા આમ,
સખીરી, તમે અમારા કલમજાયા શબ્દઅડોઅડ પથરાયેલું ધામ .