કવિતા:સંજીવની

આગળ ઉપર જોયું જશે

હે મન અધિરા મા હજો આગળ ઉપર જોયું જશે

એ  જે પઢાવે  તે પઢો  આગળ ઉપર જોયું જશે

તેં રાસલીલાનું નિમંત્રણ મોકલ્યું આગ્રહથી પણ-

આજે  તો  છે  ઉજાગરો આગળ ઉપર જોયું જશે

ઈચ્છા લગોલગ છેક આવીને ઊભા છો તો હવે

આંખો મીંચીને ખાબકો આગળ ઉપર જોયું જશે

આદમના વંશજ આદમી ! ખાબોચિયું શું ચીજ છે ?

ના આમ થા  બેબાકળો  આગળ ઉપર જોયું જશે

પાષાણને  પલટાવતી  વાણીનું હો વરદાન તો-

સૌ કોઈને  એ  સાંપડો   આગળ ઉપર જોયું જશે

શતરંજની બાજી છે દુનિયા, એવું સમજાયા પછી

ચાલો  નવેસરથી રમો   આગળ ઉપર જોયું જશે

ઊંડાં રહસ્યો જે   ઉકેલી  ના   શક્યા  તેણે  કહ્યું-

હમણાં ઉતાવળ ના કરો આગળ ઉપર જોયું જશે