કવિતા:સંજીવની

હોવાની ચર્ચા - ગઝલ

જ્યાંથી પ્રગટી ત્યાં જ હજુ છે હોવા ના હોવાની ચર્ચા

દીપ  તળેનું  અંધારું  છે   હોવા  ના હોવાની  ચર્ચા

પહાડ એજ ને એ જ અણું છે હોવા ના હોવાની ચર્ચા

પણ  સ્વભાવે સાવ ભીરું છે હોવા ના હોવાની ચર્ચા

 મેં ચીંધ્યું ને તેં ભળ્યું એ બન્નેના કોઈ વચગાળામાં ,

સ્હેજ  ઝબૂકતું ચાંદરણું છે   હોવા ના હોવાની ચર્ચા 

શરણે   આવેલા  હોલાને  બેસાડ્યો એ ત્રાજવડાની
બીજી  બાજુનું  પલ્લું   છે   હોવા ના  હોવાની ચર્ચા

આખેઆખા શબ્દકોષમાં  જેના ઉપર  અંખ ઠરી  તે

અરુ-પરુ  કે  અશુ-કશું   છે  હોવા ના હોવાની ચર્ચા

યુગોથી ચર્ચાય રહ્યાના  કારણસર  લાગે  છે પુખ્ત ,

આમ સ્વભાવે સાવ શિશુ છે હોવા ના હોવાની ચર્ચા