જોખ્યું

સાવ  નકામું  નમતું  જોખ્યું

અમથું કાં અણગમતું જોખ્યું ?

વધ્યું વજન જ્યારે બાળકને

ફુગ્ગા  સાથે  રમતું  જોખ્યું

વાલ - રતીની વડછડ મૂકી

ધારણથી ધમધમતું જોખ્યું

બજાર  આખી  ફરી - ફરીને

માત્ર આભ આથમતું જોખ્યું

સુખમાં ના સરવાળા માંડ્યા

દુઃખ કદી  ના  દમતું જોખ્યું

લેખ-જોખનો છાંડ્યો મારગ

સઘળું  એમાં  શમતું જોખ્યું

પહેલા    કૃપાદૃષ્ટિ   ઝીલી

પછી વેણ તમતમતું જોખ્યું

તમે ગઝલની તુલના માંગી

મેં ઝરણ રૂમઝુમતું જોખ્યુ